Dètz

Dètz es una còla de joves qu'aiman la lenga e que l'emplagan cap a rodar de vidèos disponibles en linha. Valentin Belhomme nos conta l'istòria d'aquel collectiu creatiu.

D’ont ven l’idèa Dètz tv ?

Lo collectiu Dètz es nascut en 2010 del rescontre d’occitanofòns formats o en formacion als mestièrs de l’imatge, del son, del web, de la comunicacion o de la produccion. I a una manca clara de creacion audiovisuala en occitan. E avèm creat Dètz amb l’envèja de far de propausicions, e de partejar las competéncias de cadun dels detzaires per balhar l’envèja a d’autres de gausar rodar filmes en occitan.

Quantes sètz e qué ligam avètz amb la lenga occitana ?

A la debuta, èrem dètz, ara sèm un bon quinzenat a èsser actius dins lo collectiu. Que siá lenga de familha o lenga apresa, totes avèm un ligam e un interést fòrt per l’occitan. Los membres de Dètz vènon de tot lo territòri occitan enmai d’en defòra, de Provença a Gasconha, o de nòrd de França. Ensajam de balhar un imatge descomplexat de la lenga, e amb las aisinas qu’avèm, de la far veire e ausir.

Quines son los vòstres projèctes venents ?

Aqueste estiu, nos sèm amassats per realizar tot un fum de vidèos a l’entorn de la Banana del Segalar. Una residéncia d’ont son sortidas creacions aplechadas amb suènh e que marchan plan. Aqueste an anèm rodar d’autras ficcions cortas e reportatges messorguièrs dins aqueste esperit. Autrament nos podètz totjorn encontrar a l’Estivada de Rodés e a la nòstra serada de difusion tolosenca d’octobre. Dèuriam tanben tornar far las Cogordas Awards, mas prendrà segurament una autra forma. Te ne disi pas mai, la seguida es de veire sus detz.tv !