Nos podetz contar cossí se debalava la debuta del jornalet ?
Era idèa de hèr un jornau web en occitan, l’auia ja en 2007. Jo ja hèva jornalisme en occitan, e volia hèr quauquarren mès ambiciós, inspirat en projècte catalan de VilaWeb
En 2011 rescontrè a Jaume Clotet, un jornalista especializat en hèr jornaus, qu’auie era illusion de bastir un jornau entà aumplir er espaci mediatic occitan. Qu’ei atau, que mos metérem a hèr-lo damb eth sosten des collègues de VilaWeb, e tanben des bretons de 7Seizh, des aragonesi d’Arredol, e d’auti jornaus en lengües minorizades, e damb eth sosten des que confièren en publicar era sua publicitat tre eth prumèr moment: Conselh Generau d’Aran, Generalitat de Catalonha, Convergéncia Occitana…
Que cau tanplan mercejar a tota era gent qu’a hèt possible Jornalet e que trabalhen cada dia en revisant articles, en escriuent, en tot her promocion…
Avetz de contacts particulars amb los legeires o autors de blòc, sul jornalet.com o suls malhums socials ?
Jornalet ei vengut un jornau fòrça participatiu, e es legeires de còps vien collaborators, e es collaborators legeires. I a fòrça correspondéncia per e-mail damb es legeires que prepausen, que suggerissen, qu’opinen, etc. Totun, que sajam tanben de hèr a viuer Jornalet per mejan des hilats sociau, mès que mès Twitter e Facebook.
Qué tipe d'adaptacion vos cal far rapòrt a la diversitat dialectala de l'occitan ?
Es articles signadi per un autor, o es articles d’opinion, son escriti en dialècte causit pera persona qu’escriu. Tot çò d’autre qu’ei en occitan estandard.
Tenètz de projèctes pel futur ?
Entath futur que voleríem professionalizar Jornalet, poder auer un salari, aufrir aumens 12 notícies jornalières e fin finau, damb eth temps, hèr un jornau en papèr entà Occitània tota.
Barcelona - Tolosa
Espanha - França